Kurt Heine - Bildchronist

Zo bě fotograf Kurt Hajna (1906–1986) chronist 20. lětstotka, pokazuja jeho wuběrne fotografije, kiž je wudawaćel Jürgen Maćij do wobrazoweho zwjazka »Kurt Heine – Bildchronist« zjimał. Hižo jako šuler a pozdźišo jako wučer w Komorowje pola Klukša započa so Hajna za fotografiju zajimować. Po tym zo bu na spočatku Druheje swětoweje wójny do wójska zwołany, bu wón jako wójnski rozprawjer 1943 w kotole Stalingrada zajaty. Skónčnje skutkowaše wot lěta 1949 jako swobodny nowinarski fotograf w Budyšinje, hdźež dźěłaše hłownje za lokalne medije, ale tež za Domowinu, dźiwadło abo muzej. Reprezentatiwne wobrazy 1930-tych do 1970-tych lět pokazuja wokomiki načasnych stawiznow a rysuja towaršnostne změny we Łužicy.
W tekstach knihi zaběraja so awtorojo Annett Brězanec, Alfred Krawc, Robert Lorenz a Jürgen Maćij ze žiwjenjom a skutkowanjom Kurta Hajny, zapřijejo při tym tež jeho dźěławosć na polu filma, a dawaja dohlady do žiwjenja połne łamkow.